Kur është hera e fundit që u ndjeve vërtet i/e qetë në trupin tënd?
Jo thjesht i relaksuar për një moment. Por ajo qetësia e thellë ku shpatullat bien natyrshëm, ku merr frymë pa u menduar, ku trupi ndihet si shtëpia jote.
Nëse nuk e mban mend, nuk je vetëm.
Studime të fundit tregojnë që 78% e njerëzve jetojnë me një nivel “tensioni” në trup – një lloj kontraktimi i përhershëm që e kemi pranuar si normalitet. Ndoshta e ndjen tek qafa pas një dite të gjatë. Ose tek nofulla kur zgjohesh në mëngjes.
Sot do të flasim për diçka që nuk flitet shpesh në psikologji: si të rikthesh sigurinë në trupin tënd, jo vetëm në mendjen tënde.
Para pak kohësh, një menaxhere rreth të dyzetave, erdhi në zyrën time me këtë ankesë: “Fleura, gjithçka në jetën time po shkon mirë tani. Por trupi im nuk e di këtë.”
Kishte kaluar 8 muaj në një proces të vështirë divorci, duke menaxhuar njëkohësisht një departament të ri në punë. Tani gjithçka ishte stabilizuar; procesi i divorcit kishte përfunduar, puna po shkonte shumë mirë.
“Zgjohem çdo mëngjes sikur do të ndodhë diçka e tmerrshme,” më tha. “Shpatullat i kam aq të ngritura sa më dhembin veshët. Stomaku është gjithmonë i trazuar. Sikur trupi im është në pritje të një goditjeje”
Ajo që kjo paciente po përjetonte është fenomen i dokumentuar shkencërisht: trupi ynë e mban mend stresin më gjatë se mendja jonë.
Dr. Bessel van der Kolk, në librin e tij revolucionar ku flet për traumat “The Body Keeps the Score”, e shpjegon kështu: “Trauma jeton në trup, jo vetëm në mendje. Dhe shërimi duhet të fillojë në trup.”
Por ja lajmi i mirë: ashtu siç trupi “mëson” të jetojë në stres, ai mund të ri-mësojë sigurinë. Dhe për këtë ka teknika edhe jashtë kolltukut të terapisë.
4 Mënyrat praktike:
- Teknika “5-4-3-2-1”
Kur ndihesh i shkëputur nga trupi yt, identifiko:
- 5 gjëra që sheh(numëroji me zë)
- 4 gjëra që prek(ndiej teksturën)
- 3 gjëra që dëgjon(identifikoji dhe thuaji)
- 2 gjëra që nuhat(si kafeja, parfumi)
- 1 gjë që shijon(Nëse nuk ka diçka, shijo pak ujë)
Kjo të rikthen në momentin e tanishëm dhe i sinjalizon trupit: “Jemi të sigurt TANI.”
- Lëvizje të ngadalta
Jo stërvitje intensive! Por:
- Ecje 10-minutësheduke e mbajtur vëmendjen tek hapat
- Lëvizje të lehtatë trupit me muzikë të qetë
- Stretching i ngadaltë
Pas një periudhe të gjatë stresi, trupi harron se si të çlirohet. Lëvizjet e ngadalta, mundësisht ritmike, i riaktivizojnë muskujve këtë kujtesë trupore: “ja kështu ndihemi kur jemi të lirë dhe të sigurt.”
- Dushi i alternuar (nxehtë-ftohtë)
Një teknikë e vjetër por e fuqishme:
- 2 minuta ujë i ngrohtë
- 30 sekonda ujë i freskët
- Përsërite 3 herë
- Përfundo me ujë të ngrohtë
Ndryshimi i temperaturës është si një buton biologjik; e detyron trupin të dalë nga modaliteti i stresit dhe të rifokusohet në momentin e tanishëm.
- Frymëmarrja “4-7-8” për rivendosje
Metoda e Dr. Andrew Weil:
- Merr frymënga hunda për 4 sekonda
- Mbajepër 7 sekonda
- Lëshojenga goja për 8 sekonda
- Përsërite 4 herë
Kur frymënxjerrja zgjat më shumë se sa frymëmarrja, trupi merr sinjalin që nuk është në emergjencë. Sepse kur jemi në alarm, ne bëjmë pikërisht këtë: shpeshtojmë frymëmarrjen, rrahjet e zemrës, rritet niveli i adrenalinës sepse kemi nevojë për energji të menjëhershme. Nëpërmjet kësaj teknike, ne i tregojmë trupit që jemi të qetë dhe të sigurt. Kortizoli bie dhe trupi fillon procesin e vetë-riparimit.
Pyetja reflektuese e javës:
“Ku e ndjen stresin në trupin tënd? Nëse do t’i jepje një formë, ngjyrë dhe teksturë, si do ta përshkruaje?”
(Nëse dëshiron mund ta ndash përgjigjen me mua.)
P.S. Nëse trupi yt ka qenë në gjendje stresi për më shumë se 6 muaj dhe këto teknika nuk të ndihmojnë pas 2 javësh, konsidero të lësh një takim me një psikolog. Ndonjëherë trupi ka nevojë për ndihmë profesionale. Dhe kjo është plotësisht normale. 🤍
Fleura Shkëmbi
Psikologe Klinike, Coach & Hipnoterapiste
Autore e “Gjurmët e Padukshme të Frikës: Rruga për të Fituar mbi Ankthin”