KUSHTET DHE AFATET

Trajnimi “Gjuha e Ndryshimit” – NLP dhe Hipnoza Eriksoniane

Këto kushte dhe afate janë krijuar për të garantuar një eksperiencë profesionale, të sigurt dhe të respektueshme për të gjithë pjesëmarrësit.

1. Palët dhe Objekti

Këto Kushte dhe Afate (“Kushtet”) rregullojnë marrëdhënien mes Inner Life Albania, të përfaqësuar nga Dr. Fleura Shkëmbi (“Organizatori”), dhe çdo personi që regjistrohet (“Pjesëmarrësi”) në trajnimin “Gjuha e Ndryshimit — NLP dhe Hipnozë Eriksoniane” (“Programi”), i zhvilluar në Tiranë.
Regjistrimi në Program nënkupton pranimin e plotë të këtyre Kushteve.

2. Përshkrimi i Programit

• Niveli I — Bazat e NLP-së & Hipnozës Eriksoniane: 12 orë, 2 fundjava, pa certifikim.
• Niveli II — Niveli i avancuar: 12 orë, 2 fundjava, certifikim ndërkombëtar IBNIC (kërkon përfundimin e Nivelit I).
• Paketa e plotë (Niveli I + II): 24 orë, 4 fundjava, certifikim ndërkombëtar IBNIC.

Kalendari, orari dhe vendndodhja konfirmohen me shkrim (email/WhatsApp) pas regjistrimit dhe janë pjesë përbërëse e këtyre Kushteve.
Numri i pjesëmarrësve në çdo cikël është i kufizuar (deri në 20 veta), për të garantuar cilësinë e praktikës në grup të vogël.

3. Regjistrimi dhe Pranimi

Regjistrimi bëhet përmes formularit online në fleurashkembi.com. Vendi rezervohet vetëm pas konfirmimit të pagesës (të plotë ose këstit fillestar, sipas pikës 4).
Organizatori ruan të drejtën të mos pranojë ose të anulojë një regjistrim, me arsyetim me shkrim, në raste të papërshtatshmërisë me natyrën e Programit (p.sh. kushte shëndetësore që bien ndesh me pikën 9) ose kur numri maksimal i vendeve është plotësuar.
Niveli II pranon vetëm pjesëmarrës që kanë përfunduar Nivelin I (në këtë program ose ekuivalent, me vlerësim nga Organizatori).
Organizatori rezervon të drejtën të refuzojë regjistrimin në raste të veçanta, nëse vlerëson se pjesëmarrja mund të cenojë mbarëvajtjen e trajnimit ose sigurinë e grupit.
Trajnimi është i hapur për çdo person mbi moshën 18 vjeç.

4. Çmimet dhe Pagesa

Çmimet janë në euro dhe përfshijnë TVSH-në sipas legjislacionit në fuqi. Pagesa mund të bëhet e plotë në momentin e regjistrimit, ose me këste sipas marrëveshjes së shkruar me Organizatorin përpara fillimit të ciklit të parë.

5. Politika e Anulimit dhe Rimbursimit

Anulim nga Pjesëmarrësi:

• Më shumë se 14 ditë para fillimit të ciklit: rimbursim i plotë, minus një tarifë administrative prej 10%.
• 7–14 ditë para fillimit: rimbursim 50%, ose transferim i plotë i vendit në ciklin pasardhës.
• Më pak se 7 ditë para fillimit, ose mosparaqitje (“no-show”): pa rimbursim; mundësi transferimi në ciklin pasardhës me pagesë administrative.

Anulim nga Organizatori: nëse Programi anulohet nga Inner Life Team (p.sh. numër i pamjaftueshëm pjesëmarrësish, forcë madhore), Pjesëmarrësi ka të drejtë të zgjedhë mes rimbursimit të plotë 100% ose transferimit në ciklin pasardhës.
Çdo kërkesë për anulim ose rimbursim bëhet me shkrim (email) dhe konfirmohet brenda 5 ditësh pune.

6. Ndryshime në Kalendar

Organizatori ruan të drejtën të ndryshojë datat, orarin ose vendndodhjen e një sesioni për arsye të justifikuara (p.sh. forcë madhore, sëmundje e trajnueses), duke njoftuar Pjesëmarrësit sa më shpejt të jetë e mundur dhe duke ofruar një datë alternative brenda të njëjtit cikël ose ciklit pasardhës, pa kosto shtesë.
Në rast se ndryshimet ndikojnë në mënyrë të konsiderueshme mbi zhvillimin e Programit, Organizatori do të komunikojë alternativat e disponueshme dhe do të përpiqet të minimizojë çdo shqetësim për Pjesëmarrësit.

7. Certifikimi

Certifikimi ndërkombëtar (IBNIC) lëshohet vetëm për pjesëmarrësit që:

• kanë ndjekur të paktën 80% të orëve të Programit;
• kanë përfunduar me sukses të gjitha komponentët e kërkuar të të nxënit;
• kanë demonstruar kompetencat minimale të kërkuara sipas kritereve të vlerësimit të Programit.

Vlerësimi realizohet gjatë gjithë Programit përmes:

• vëzhgimit të ushtrimeve praktike;
• demonstrimit të aftësive;
• pjesëmarrjes aktive;
• vlerësimit përfundimtar të kompetencave.

Kriteret e detajuara të vlerësimit përcaktohen në Assessment Policy dhe Competency Framework të INNER LIFE ALBANIA.
Në rast se një pjesëmarrës nuk arrin standardin minimal të kompetencës, ai ose ajo mund të kërkojë një rivlerësim (reassessment) sipas procedurave të Organizatës.
Pjesëmarrësit që mungojnë në më shumë se 10% të Programit duhet të rikuperojnë orët e humbura përpara se të jenë të kualifikuar për certifikim.
Niveli I, i marrë më vete, nuk përfshin certifikim. Certifikimi ndërkombëtar lëshohet vetëm pas përfundimit me sukses të Nivelit II (ose Paketës së Plotë).
Çdo pjesëmarrës i certifikuar merr një Numër Kredenciali unik të verifikueshëm sipas procedurave të IBNIC.

8. Konfidencialiteti

Çdo informacion personal i ndarë nga Pjesëmarrësit gjatë ushtrimeve praktike  trajtohet me konfidencialitet të plotë nga Organizatori dhe nga të gjithë pjesëmarrësit e tjerë të grupit.
Pjesëmarrësit pranojnë, si kusht i pjesëmarrjes, të respektojnë konfidencialitetin e përvojave personale të ndara nga kolegët e tyre gjatë sesioneve praktike dhe të mos i zbulojnë ato jashtë kontekstit të trajnimit.
Organizatori respekton gjithashtu konfidencialitetin e çdo informacioni personal ose profesional të marrë gjatë Programit dhe e përdor atë vetëm për qëllime edukative, administrative ose të certifikimit.

9. Shëndeti, Siguria dhe Pëlqimi i Informuar

Programi përfshin ushtrime praktike të hipnozës eriksoniane dhe teknika NLP që përfshijnë punë me gjendje emocionale. Këto teknika mësohen dhe praktikohen në kontekst edukativ-profesional, jo si trajtim klinik individual.
Pjesëmarrësi deklaron se, sipas njohurisë së tij/saj, nuk vuan nga ndonjë kusht shëndetësor (fizik ose psikik) që e bën të papërshtatshme pjesëmarrjen aktive në ushtrime hipnotike, dhe se do të njoftojë Organizatorin paraprakisht për çdo shqetësim të tillë.
Organizatori ruan të drejtën të përjashtojë nga ushtrime specifike (jo domosdo nga i gjithë Programi) çdo pjesëmarrës për të cilin identifikohet një rrezik i mundshëm, bazuar në gjykimin profesional të trajnueses.
Pjesëmarrja në ushtrimet praktike është vullnetare në çdo moment; çdo pjesëmarrës mund të tërhiqet nga një ushtrim specifik pa pasoja.
Organizatori mund të rekomandojë që një pjesëmarrës të mos marrë pjesë në ushtrime të caktuara ose të ndërpresë përkohësisht pjesëmarrjen në Program, nëse vlerësohet se kjo është në interes të sigurisë së tij/saj ose të grupit.
Programi ka karakter edukativ dhe zhvillimor. Ai nuk përbën psikoterapi, trajtim mjekësor, diagnozë apo shërbim të shëndetit mendor dhe nuk zëvendëson konsultimin me profesionistë të licencuar të fushës së shëndetit.

10. Pronësia Intelektuale

Të gjitha materialet e Programit (workbook, slide, e-book, video, metodologjia e mësimdhënies) janë pronë intelektuale e Inner Life Albania / Dr. Fleura Shkëmbi dhe u ofrohen Pjesëmarrësve vetëm për përdorim personal, jo-komercial.
Ndalohet:

• kopjimi;
• shpërndarja;
• publikimi;
• rishitja;
• përdorimi për trajnime të tjera;
• riprodhimi me mjete të inteligjencës artificiale për qëllime komerciale,

pa autorizim paraprak me shkrim nga organizatori.
Pjesëmarrësit do të kenë akses në materialet online që organizatori vendos në dispozicion për përdorim personal dhe edukativ.

11. Filmimet dhe Regjistrimet

Organizatori mund të realizojë fotografi ose regjistrime video gjatë zhvillimit të Programit për qëllime dokumentimi, promovimi dhe komunikimi profesional.

Çdo pjesëmarrës ka të drejtë të njoftojë me shkrim, përpara fillimit të Programit, nëse nuk dëshiron të shfaqet në materiale promovuese. Organizatori do të marrë masa të arsyeshme për të respektuar këtë kërkesë.

Pjesëmarrësit nuk lejohen të realizojnë regjistrime audio/video të sesioneve dhe nuk mund të realizohen fotografi/video të ushtrimeve apo materialeve të trajnimit, pa miratimin paraprak me shkrim të Organizatorit dhe pëlqimin e personave të përfshirë.

12. Pjesëmarrja dhe mungesat

Pjesëmarrësi është përgjegjës për ndjekjen e rregullt të Programit. Organizatori nuk ka detyrimin të organizojë sesione individuale zëvendësuese për orët e humbura.
Kur është praktikisht e mundur, Organizatori mund të lejojë rikuperimin e orëve të humbura në një cikël të ardhshëm ose përmes një forme tjetër të përshtatshme, sipas gjykimit të tij.
Mungesat nuk përbëjnë bazë për rimbursim të plotë ose të pjesshëm të tarifës së Programit.

13. Kodi i Sjelljes

• Respekt reciprok mes pjesëmarrësve dhe ndaj trajnueses, pavarësisht gjinisë, orientimit, prejardhjes fetare, etnike apo kulturore.
• Pjesëmarrje aktive dhe e ndershme në ushtrime, pa detyrim për të ndarë më shumë se ç’ndihet rehat.
• Ndalohet çdo formë ngacmimi, diskriminimi apo sjelljeje që cenon sigurinë psikologjike të grupit.
• Respektimi i kufijve profesionalë gjatë ushtrimeve praktike dhe komunikimit me pjesëmarrësit e tjerë.

Shkelja e rëndë e Kodit të Sjelljes mund të çojë në përjashtim nga Programi, pa rimbursim, sipas gjykimit të Organizatorit.
Organizatori rezervon të drejtën të ndërhyjë në çdo moment për të garantuar një mjedis të sigurt, etik dhe respektues për të gjithë pjesëmarrësit.

14. Të Dhënat Personale

Të dhënat e mbledhura gjatë regjistrimit (emër, kontakt, profesion) përdoren vetëm për qëllime administrimi të Programit, komunikim dhe, me pëlqim shprehimisht të dhënë, për buletinin informativ (newsletter). Të dhënat nuk u shpërndahen palëve të treta pa pëlqim, përveç rasteve të kërkuara nga ligji ose nga procesi i verifikimit të certifikimit IBNIC.
Pjesëmarrësi ka të drejtë të kërkojë në çdo moment aksesin, korrigjimin ose fshirjen e të dhënave të tij personale, me kërkesë me shkrim.
Të dhënat ruhen vetëm për aq kohë sa është e nevojshme për administrimin e Programit, përmbushjen e detyrimeve ligjore dhe procesin e certifikimit.

15. Ankesat

Çdo shqetësim ose ankesë lidhur me Programin i drejtohet fillimisht Organizatorit me shkrim (email), i cili do të përgjigjet brenda 10 ditësh pune.
Nëse çështja nuk zgjidhet në nivel të Organizatorit dhe lidhet me standardet e akreditimit, Pjesëmarrësi ka të drejtë t’i drejtohet procedurës së pavarur të ankesave të IBNIC (International Board of NLP and Integrative Coaching), sipas udhëzimeve të publikuara në ibnic.org.

16. Kufizimi i Përgjegjësisë

Programi ka natyrë edukative-zhvillimore dhe nuk zëvendëson trajtimin psikoterapeutik apo mjekësor individual. Organizatori nuk mban përgjegjësi për vendime personale, profesionale apo shëndetësore të marra nga Pjesëmarrësi si rezultat i pjesëmarrjes në Program, përtej detyrimit për të ofruar trajnim me kujdes dhe profesionalizëm të arsyeshëm.
Certifikimi i lëshuar nga Programi nuk autorizon ushtrimin e profesioneve të rregulluara me ligj, si psikoterapia, mjekësia ose profesione të tjera të licencuara. Pjesëmarrësit janë përgjegjës të ushtrojnë aktivitetin e tyre profesional vetëm brenda kompetencave të fituara dhe në përputhje me legjislacionin në fuqi.

17. Dispozita Përfundimtare

Këto Kushte rregullohen nga legjislacioni i Republikës së Shqipërisë.
Organizatori rezervon të drejtën t’i përditësojë këto Kushte, duke publikuar versionin më të fundit në faqen zyrtare ose duke i njoftuar pjesëmarrësit me shkrim. Ndryshimet nuk prekin të drejtat dhe detyrimet që kanë lindur përpara hyrjes së tyre në fuqi, përveç rasteve kur kërkohet nga ligji.
Për çdo pyetje: [email protected] ose +355 69 2199 836.